Казан Кирмәнең Пушечный дворында «UenFest»Татарстан халыкларының традицион уеннары II төбәкара фестиваленең йомгаклау чарасы узды. Татарстанның төрле районнарыннан җыелган фестиваль финалистлары нәкъ биредә үзләренең осталыкларын күрсәтте. Жюри һәм күп санлы тамашачылар игътибарына халык уеннары үрнәкләрен тәкъдим иттеләр. Яшүсмерләр һәм балалар төрле милләт киемнәрендә җырлады, биеде, үз төбәкләрендә кайчандыр популяр саналган уеннарын башкарды.
Сер түгел балачак урам уеннары һәркемнең күңелендә сакланып кала торган җылы хатирәләргә бай була. Бигрәктә хәзерге заманда яшь буынны элекеге йолаларга авызландыру мәсьәләсе кискен тора. Проект авторлары белдергәнчә, мондый чаралар безне берләштерә, рухи мирасыбызны барлауда зур өлеш кертә.
«UenFest» финалында җәмгысе 14 коллектив катнашты. Аларның җитәкчеләренә дипломнар һәм “Идел” журналлары таратылды.
«UenFest» Татарстан халыкларының традицион уеннары II төбәкара фестиваленең җиңүче – Кукмараның “Инвожо» фольклор коллективы. Алар Сочига «Сочи Парк» күңел ачу комплексына юллама отты. Кукмаралыларның “Сез мәллә?” уены күпләрнеең күңеленә хуш килде.
Бәйрәм мәйданында һәркем өчен төрле мастер класслар оештырылды, балалар ярышларда да катнашты.
Исегезгә төшереп узабыз, Татарстанда 1917 мәдәният оешмалары эшли, аларда 80 000 балалар һәм яшүсмерләр шөгыльләнә. Татарстан Мәдәният министрлыгы, «Таткультуресурсүзәк» ДБУ коллективы тормышка ашырган «UenFest»Татарстан халыкларының традицион уеннары II төбәкара фестивале төрле милләт вәкилләренең коллективларын бер мәйданга җыйды, киң җәмәгатьчелеккә күрсәтте.
