Бүген, 17 октябрь, Татарстан Республикасы Премьер-министры урынбасары, Бөтендөнья татар конгрессының Милли Шурасы рәисе Васил Шәйхразыев эш сәфәре белән Алтай Республикасына килде. Биредә Васил Шәйхразыев Алтай Республикасында 2024 елда Төрки Сабан туе узачак мәйданы белән танышты.

“Төрки Сабантуй” 2024 елның 25 маенда Алтай Республикасында үткәреләчәк. Сабантуйны оештыруга Татарстаннан Актаныш районы җаваплы. Үткәрү урыны –  Таулы Алтайның Үзәк мәйданы. Мәйдан 15 мең кешене сыйдыра ала.

Васил Шәйхразыевны мәйдан белән Алтай Республикасы Хөкүмәте Рәисенең беренче урынбасары Эжер Елбаков таныштырды.