Районыбызда бердәнбер исән-сау Бөек Ватан сугышы ветераны Габделхак Җиһаншин өендә тавыш бирде.

Якташыбыз 1943 елда 18 яшендә фронтка китеп,  сугышта һәм хәрби хезмәттә  7 ел да 3 ай булган. Дан ордены һәм  “Батырлык өчен” медале иясе, кече сержант Хамзин (ул вакытта шушы фамилиядә йөри) җиңүне Балтыйк буенда каршылый.

Бүген кызлары Рәшидә, Хәтимә тәрбиясендә яшәүче 98 яшьлек Габделхак бабай, сәламәтлеге белән бәйле, өйдә генә йөри, күбрәк утырып тора. Шунлыктан  авылның сайлау участогында эшләүче авылдашлары аны ил президентлыгына кандидатны өенә барып сайлаттылар.

-Рәхмәт, хөрмәтле булып яшәдем, әле дә игътибарсыз яшәмим, балаларым карый. Шөкер, әкрен генә йөреп торам шулай. Бүген ил-көнебездә иминлек, муллык, көч, җитеш тормыш өчен, тынычлык урнашуын теләп тавыш бирдем, – диде Габделхак Җиһанша улы.

Чыганак: nashcheremshan.ru