Зур Чирекле авылы урта мәктәбендә мөнәҗәтләр кичәсе һәм сөекле Пәйгамбәребез Мөхәммәднең (с.а.в.с.) туган аена багышланган мәҗлес үткәрелде. Әлеге мәҗлескә 6А классы укучыларының әбиләре һәм карт әбиләре чакырулы иде.
Зур Чирекле урта мәктәбенең югары категорияле татар теле һәм әдәбияты укытучысы, Татарстанның һәм Ульяновск өлкәсенең атказанган укытучысы, Халык мәгарифе отличнигы Нәсиха Рәфат кызы Ягудина һәм 6А класс җитәкчесе Хава Габдулла кызы Мавлютова кунакларны матур итеп сәламләп, ачык йөз белән каршы алдылар. Мәктәпнең музей җитәкчесе Галия Рәшит кызы Мавлютова, ОДНКР укытучысы Нурия Ханбәл кызы Темербулатова һәм мәктәп китапханәсе мөдире Әлфия Ханбәл кызы Сулейманова да кунакларга җылы тәбрикләү сүзләрен ирештерделәр.
Мәктәпнең матур, якты актлар залында мөселман киемнәре кигән кызлар Ульбекова Нурия, Аюпова Ләйсән, Аюпова Камилә, Сулейманова Мәрьям һәм Аюпова Мәдинә намазлыклар өстенә утырып, һәркемне уйландырырлык тирән эчтәлекле мөнәҗәтләр әйттеләр. Ә Нугайбеков Сәид “Инандым мин Аллаһка” дип исемләнгән мөнәҗәтне башкарды.
“Балаларыбыз милли йолаларыбыз, гореф-гадәтләребез турында ишетеп, аларны күреп, ана телебезне, догаларыбызны өйрәнеп үсәләр. Татар халкы меңләгән еллар буе телен, милләтен саклап кала алган икән, бүген дә безнең алдыбызда аны киләчәк буыннарга тапшыру бурычы тора. Туган телне үзебез белү генә аз ул, аны балаларыбызга, оныкларыбызга да өйрәтергә кирәк. Алар татар телендә сөйләшсә генә, ана телебез, гореф-гадәтләребез беркайчан да югалмас. Өйдә ата-аналар үзләренең балалары белән күбрәк татар телендә сөйләшсеннәр иде. Без татарлар бит, бөек халык вәкилләре. Бәет сүзе гарәп теленнән алынган. Бәетләрдә көтелмәгән фаҗигале вакыйгалар, үлем очраклары, гадәттән тыш хәлләр тасвирлана. Мөнәҗәтләр кешенең йөрәк түреннән, иң нечкә кичерешләреннән, кайгы-хәсрәтеннән чыгып языла. Ул Аллаһыга ялвару, Аңардан ярдәм сорау булып санала. Кайдан да булса ярдәм алу мөмкинлеге юкка чыккан адәм баласы иң олуг затка – Аллаһы Тәгаләгә мөрәҗәгать итә, чөнки мондый чакта инде кеше үзенә Аллаһыдан башка беркем дә һәм берничек тә ярдәм итә алмаячына чын күңелдән инана. Рәсүлебез Мөхәммәднең (с.а.в.с.) Аллаһы Тәгалә тарафыннан җиргә җибәрелгән соңгы Пәйгамбәр булуы һәм аның Ислам динен дөньяга таратуы буыннан-буынга күчеп килүче мөнәҗәтләрдә чагылыш тапкан. Бүген без сөекле Пәйгамбәребезгә (с.а.в.с.) багышлап язылган мөнәҗәтләрне яңгыратырбыз”, – диде Нәсиха Рәфат кызы Ягудина.
Мәктәп музеена килеп кергәч тә без бала чагыбызга әйләнеп кайткан сыман булдык. Татар тарихы, рухи мирасыбыз, кием-салымнар, чиккән сөлгеләр, мендәр тышлары, бизәкле кашыклар, он тигәнәсе – болар барысы да без күреп үскән, яшь чакта файдаланган әйберләр. Музей буенча экскурсияне 5 класс укучылары үткәрде, алар бик тә эчтәлекле, матур итеп сөйләделәр. Музейны оештыру максатында күп көч һәм тырышлык куйган өчен аның җитәкчесе Галия Рәшит кызына олы рәхмәтебезне белдерәбез. Музейның шәрәфле кунаклары китабына мактау сүзләребезне дә язып калдырдык.
Аннары безне мәктәп ашханәсендә милли ризыклардан сыгылып торган мул табын көтә иде. Авылыбызның абруйлы Ак әбиләре Бәһрәмия апа Аюпова һәм Заһирә апа Куликова мәҗлесне Коръәни-Кәримнән сүрәләр уку белән башлап җибәрделәр. Алар барча әрвахларның да рухларын шатландырып дога кылдырды. Сөекле Пәйгамбәребезнең (с.а.в.с.) туган аен хөрмәтләп мәүлид укыдык һәм салаватлар, мөнәҗәтләр әйттек. Ак әбиләребез тирән эчтәлекле, гыйбрәтле вәгазьләр дә сөйләделәр. Сүз уңаеннан, Бәһрәмия апа белән Заһирә апа, инде олы яшьтә булуларына карамастан, “Өмет” газетасының якын, тугрылыклы, ышанычлы дуслары. Без “Өмет” газетасын чыга башлаган көннән бирде өйләребезгә яздырып алабыз, һәр санын кадерләп җыеп барабыз”,- диде Ак әбиләребез. Газетаны әзерләп чыгаручыларга зур рәхмәт әйттеләр, эшләрендә уңышлар теләделәр.
Мәктәп китапханәсе мөдире Әлфия Ханбәл кызы: “Нәсиха апабыз Казанга һәм Ульяновскига барган саен безгә татарча китапларны күп итеп алып кайта, аңа чын күңелдән рәхмәт”,- диде, татар телендәге китаплар күргәзмәсе белән таныштырып. Ә ОДНКР укытучысы Нурия Ханбәл кызы: “Укучыларыбыз дин дәресләренә бик теләп, ашкынып йөриләр, динислам нигезләрен тырышып өйрәнәләр һәм барча милли-мәдәни чараларда да актив катнашалар“,- дип куанычы белән уртаклашты. Аннары аның сәләтле, тырыш укучылары үзләренең иҗади осталыкларын күрсәттеләр.
Истәлекле очрашу тәмләп чәй эчү белән тәмамланды.
“Безне хөрмәтләп шушы бәйрәмгә чакырган мөгаллимәләргә – Нәсиха Рәфат кызы белән 6А классы җитәкчесе Хава Габдулла кызына, барча укытучыларга һәм аш-су хәзерләүчеләргә чын күңелдән рәхмәт. Аллаһы Тәгалә һәркайсына гаилә бәхете, исәнлек-саулык, эшләрендә уңышлар, ак бәхетләр насыйп итсен. Туган илебезне сакларга киткән ир-егетләребез Җиңү шатлыгы белән исән-сау өйләренә әйләнеп кайтсыннар иде. Киләчәктә дә шундый шатлыклы очрашулар булып торсын. Аллаһы Тәгалә ил-көннәрбезгә тынычлык, патшаларга сабырлык бирсен”,- дип Бәһрәмия апа ашка дога кылдырды.
Халимә РАМАЗАНОВА,
Зур Чирекле авылы.
Источник: emet73.ru
