Г.Ибраһимов исемендәге Тел, әдәбият һәм сәнгать институтында яңа юнәлеш буларак, милли балет тарихы өйрәнелә башлый.
Институтның тасвирый-гамәли сәнгать, театр һәм музыка бүлеге 2021 елгы эшчәнлегенә нәтиҗә ясау уңаеннан оештырылган түгәрәк өстәл утырышында бүлек мөдире Рауза Солтанова яңа юнәлешне өйрәнәчәк галимне — Луиза Петрованы тәкъдим итте.
«Луиза Петрова — профессиональ балет белгече. Бу безнең яңа юнәлеш. Мондый белгеч республикада бердәнбер дип беләм. Безнең максат — балет буенча мирасыбызны өйрәнү», — диде ул.
«Мин мәдәният институтында Татар балеты тарихы фәнен укыткан идем. Шунда аңладым — бу юнәлештә студентлар тәкъдим итәрдәй бер материал да юк булып чыкты. Димәк, милли балетны өйрәнү буенча эшләргә кирәк иде», — дип башлады чыгышын Луиза Петрова.
«Егерменче-утызынчы елларда милли республикаларда театрлар һәм аларда милли репертуар барлыкка килә башлый. Беренче милли балет „Шүрәле“ булуын барыбыз да беләбез. Без беренче чиратта милли балетны өйрәнәчәкбез», — диде ул.
