Бүген Алтай Республикасында Татарстанда старт алган татар токымлы атларга атланып чабышу тәмамланды. Татарстан Рәисе Рөстәм Миңнеханов чарадан фото белән Телеграм-каналында уртаклашты.
«Бүген төрки халыкларның тарихи ватаны – Алтай Республикасында Татарстан тарихында беренче татар токымлы атлар чабышы тәмамланды», – дип язган республика җитәкчесе.
Ул билгеләп үткәнчә, чабыш атлары 3 мең чакрым араны узды, алар үзләренең табигый матурлыгын гына түгел, чыдамлыгын да күрсәтте. Маршрут Россиянең сигез төбәгенең 56 торак пункты аша узды, атлар чабышы бер айдан артык дәвам итте.
