Тәтешле район мәдәният сараенда Югары Тәтешле авылы тарихына багышланган уникаль фотоальбомның икенче томы презентациясе узды.

Бу гади фотолар җыентыгы түгел — бу безнең кече Ватаныбызның йөзләрдә, вакыйгаларда һәм мизгелләрдә теркәлгән елъязмасы.

Проектның авторлары һәм илһамландыручылары булып безнең хөрмәтле якташларыбыз, актив җәмәгать эшлеклеләре һәм, иң мөһиме, үзенең кече Ватанының чын патриотлары — Зөһрә Ягъфар кызы Рәкипова һәм Вадим Гадият улы Шәйхелисламов чыгыш ясады.

Презентациядә район хакимияте башлыгы Денис Айрат улы Солтанов, хакимият башлыгының социаль мәсьәләләр буенча урынбасары Әлфия Урал кызы Шайнурова, Зәйнәп Биишева исемендәге «Китап» нәшриятының мөхәррире Дилбәр Гомәр кызы Әхтәмова, «Башкортстан Республикасы Татарлар Конгрессы» төбәк иҗтимагый оешмасы башкарма комитеты рәисе урынбасары Зәлия Рәфис кызы Ахунова, Башкортстан Республикасы Татарлар Конгрессы идарәсе әгъзасы Айгөл Рәшит кызы Ахунова, оешмалар җитәкчеләре һәм район халкы катнашты.

Башкортстан Республикасы Мәдәният министры вазыйфасын башкаручы, элеккеге районыбыз хакимияте башлыгы Фанүр Рәфис улы Шәйхелисламовның видеокотлавы чарага аеруча тантаналылык өстәде.

Чыганак: Тәтешле районы татарлары