Бөтендөнья татар конгрессының VIII съездының I утырышында Татарстан Республикасы мәдәният министры урынбасары Дамир Натфуллин чыгыш ясады. Ул Татарстан Республикасы Мәдәният министрлыгының чит илләрдә һәм Россия төбәкләрендә яшәүче милләттәшләребез белән хезмәттәшлек итү юнәлешендә эшчәнлеге турында сөйләде.

-Татар халкының мәдәниятен саклау һәм үстерү буенча дәүләт программалары кысаларында ел саен 450 дән артык мәдәни, фәнни-агарту, белем бирү чаралары үткәрелә. “Түгәрәк уен”, “Идел-йорт” фестивальләре, Рәшит Ваһапов исемендәге Халыкара Татар җыры фестивале, “Татар кызы” проекты – барысы да Россия төбәкләрендә татар иҗтимагый оешмалары тарафыннан гамәлгә ашырыла, – дип билгеләп үтте Дамир Натфуллин.

Шулай ук Татарстан Республикасы мәдәният министры урынбасары яшьләрне милли-мәдәни чараларга җәлеп итүгә юнәлдерелгән эшчәнлек турында сөйләде.

Татарстан Республикасы Мәдәният министрлыгы Бөтендөнья татар конгрессы белән тыгыз хезмәттәшлек алып бара. “Сабантуй” татар милли бәйрәмен оештыручылары һәм режиссерлары өчен үткәрелгән семинар-практикум моның мисалы булып тора.