Камышлы районының Яңа Усман авылында Самара дәүләт университетының «Сокол» эзләнүчеләр отряды әгъзалары белән кызыклы очрашу булды. Ул Бөек Ватан сугышында катнашкан Исмәгыйль Гаффан улы Вәлиәхмәтов истәлегенә багышланган иде.
Исмәгыйль Гаффан улы Вәлиәхмәтов Яңа Усман авылында 1923 елда алты балалы гаиләдә туган. Сугышка кадәр берникадәр вакыт колхозда эшләп өлгергән. 1941 елда ул сугышка китә һәм 1943 елның 13 августында “Батырлык өчен” медале белән бүләкләнә. Шул ук елның 23 августында Донбассны азат иткәндә геройларча һәлак була һәм шунда ук күмелә. Эзләнүчеләр отряды бу сугышчы турында мәгълүмат тапканнар һәм безнең белән бүлешергә килделәр.
Очрашу барышында эзләнүчеләр һәм авылдашлар Исмәгыйль Гаффан улының туганнары белән күрештеләр, аның хәрби батырлыгы өчен тапшырылган орден-медальләрен, документларын барладылар. Чарада катнашкан һәр кеше өчен бу күңелләрне нечкәртерлек әһәмиятле вакыйга булды.
Шулай ук мәктәп укучылары һәм Яшь армиячеләр белән кызыклы әңгәмә оештырылды. Героебызның батырлыгы һәм патриотизм әһәмияте турында фикер алышу булды. Укучылар сугыш турындагы истәлекләрне кызыксынып тыңладылар һәм сораулар бирделәр. Кунаклар мәктәп музеен да карап чыгып, төбәгебез тарихына бәйле экспонатлар белән таныштылар. Аннан барыбыз да Яңа Усман авылының Туган якны өйрәнү музеена юнәлдек. Бу туган җиребез тарихи мирасын тирәнрәк аңларга мөмкинлек бирде.
Очрашу ахырында эзләнүчеләр отряды әгъзалары Исмәгыйль Вәлиәхмәтов күмелгән туганнар кабереннән алып кайткан бер уч туфракны аның якыннарына тапшырдылар. Бу аның батырлыгына хөрмәт символы итеп кабул ителде.
Гөлүсә Зарипова
“Бердәмлек” газетасы
