Бүген, 14 июньдә, Саха Республикасы (Якутия) башкаласында татар мәдәнияте, спорты һәм халык традицияләренең зур бәйрәме XXV Федераль Сабантуй уза. Көннең иң көтелгән һәм иң мавыктыргыч вакыйгаларының берсе — Сабантуй мәйданында узучы милли көрәш ярышлары.
Бәйрәмнең төп герое — Сабантуй батыры исеме өчен Россиянең төрле төбәкләреннән иң көчле спортчылар көрәште. Көрәш киеренке һәм мавыктыргыч булды: һәр катнашучы җиңүгә омтылыш, көч һәм чыдамлылык күрсәтте. Көчле конкуренция нәтиҗәсендә җиңүче билгеләнде — ул Татарстан Республикасыннан Радих Сәләхов.
Сабантуй батырына Татарстан Республикасы Рәисе Рөстәм Миңнехановның төп бүләге — «Лада» автомобиле ачкычы тапшырылды. Бүләкне тантаналы рәвештә Бөтендөнья татар конгрессы Башкарма комитеты җитәкчесе Данис Шакиров тапшырды.
