31 майда 16:00 сәгатьтә Үзбәкстанның тарихи үзәге булган Бохара шәһәрендә зур тантана — Сабантуй бәйрәме узачак. Чара чит илләрдә яшәүче милләттәшләребезне берләштерү һәм татар мәдәниятен, гореф-гадәтләрен саклау өчен әһәмиятле мәйданчык булачак. Бу хакта Ташкент шәһәренең татар иҗтимагый мәдәни-агарту үзәге хәбәр итте.

Бәйрәм программасында милли уеннар һәм ярышлар: Сабантуйның аерылгысыз өлеше булган кашыкка йомырка салып йөгерү, капчык киеп йөгерү, чүлмәк вату булачак. Бәйрәмнең кульминациясе — милли көрәш ярышлары булыр дип көтелә.

Мәдәни программа кысаларында сәхнәдә татар халык җырлары яңгыраячак, бию коллективлары чыгыш ясаячак. Кунакларга милли ризыклар – чәк-чәк, өчпочмак һәм башка татар тәм-томнары тәкъдим ителәчәк.

Мондый чаралар туган җирдән ерак булса да, үз тамырларын онытмаган, татар телен һәм мәдәниятен кадерләгән кешеләр өчен очрашу, аралашу һәм танышу мөмкинлеге булвп тора. Бохарадагы бәйрәм Үзбәкстан һәм Татарстан арасындагы мәдәни элемтәләрне тагын да ныгытырга ярдәм итәчәк, диелә хәбәрдә.