Безнең ил ярдәмчел, бердәм халкы белән көчле. Махсус хәрби операция башланганнан бирле анда­гы егетләргә, аларның гаиләләренә күп кенә ярдәм чаралары оештырыла, халкыбыз гуманитар ярдәм күрсәтүдә зур өлеш кертә. Башкача мөмкин дә түгел бит, чөнки без җылы, якты өйдә кайнар ризыклар ашап, тыныч яшәсен өчен, алар гомерләрен куркы­ныч астына куеп, батырлык үрнәге күрсәтә!

Сезне гади Чүмбәли ханымнары Наҗия Юси­пова белән Кадрия Минаҗетдинова 2023 елда оеш­тырган “Народные активисты Чембилея” төркеме активистларының игелекле эшләре белән танышты­рып үтәсебез килә.

 Авыл яңалыклары белән ур­таклашу өчен генә булдырылган төркемдә бүген туган якларының чын патриотлары булган өч йөзгә якын кеше берләшкән. Чүмбәлидә төзекләндерү эшләре булсын­мы, өмәләрме, бу төркемчеләр беренчеләрдән булып ярдәм кулы суза — кыска вакыт эчендә кирәкле сумманы да җыя, техника да та­быштыра, беренчеләрдән булып үзләре дә бар эшкә керешә. Шуңа да бүген төп максатлары — махсус хәрби операциядә катнашучы­ларга булышу.

— Батырларны кайгырту, кыю егетләребезгә ярдәмебез аша туган як җылысын җиткерү, игъ­тибар, хөрмәт күрсәтү — безнең изге бурыч! Билгеле, һәркем моны тиешенчә аңлап бетерми, каршы килүчеләр, нахак яла ягу­чылар да аз түгел. Шуңа да кара­мастан, без күңел төшенкелегенә бирелмибез, киресенчә, башла­ган эшебезне күпкә куәтлерәк дәвам иттерергә тырышабыз. Ә бит бер йодрык булып берләшеп, әлеге ярдәмебезнең мәгънәсен, савабын аңлап, хәлдән килгәнчә булышлык күрсәтсәк, егетләргә булган кайгыртуыбыз, җылы мөнәсәбәтебез аларга чит җирләрдә тагын да көч, сабырлык өстәр, исән-сау кайту көнен якынайтыр иде, — ди Чүмбәли ханымнары.

“Үзебезнекеләрне ташламыйбыз!” акциясе кысаларында СВОга бе­ренче гуманитар йөкләр озаты­ла башлагач, төркемне оешты­ручылар үзара киңәшеп, “ирекле ярдәм” тамгасы астында пост урнаштыралар. Һәм кыска вакыт эчендә авылдашларыннан ки-рәкле әйберләр — кием-салым, мендәр-сөлгеләр, оекбашлар, тозланма-кайнатмалар җыела, финанс ярдәм килә башлый. Тула­ем алганда, төркем оешканнан бирле иң кирәкле медикамент­лар, аш-су, чынаяк-кашыклар, табалар, салфеткалар, зур күләмдә су һәм башкалары ияләренә барып ирешкән инде.

Төп активистлар Мәскәүдә яшәгәнгә, биредә эшчәнлекне аларның уң куллары булган Татьяна Ходайбердина күз уңында тота. Нәкъ менә аның инициативасы белән “Коробка добра” акциясе булдырылып, авыл кибетендә СВОга ярдәм өчен махсус тартма урнаштырыла һәм чүмбәлилеләрнең күбесе аны игътибарсыз калдырмый.

— Махсус хәрби операциягә бу­лышлык күрсәтү, гуманитар ярдәм туплау буенча беренче көннәрдән зур эшчәнлек алып бар­ган Нижгар татарлары конгрессы Гөлнара Абдуллина, Иршат Абдулкәримов, өлкә татар автономиясе вәкиле Зилә Ахмадуллина белән дә эш иттек — алар аша бик күп әйберләр СВОга, Мулинодагы госпитальга озаттык. Бүген «ПоможемZСеченово» төркеме белән тыгыз хезмәттәшлек итәбез. Соңгы ике ай эчендә генә дә Белгород өлкәсенә генә бездән кулъяулыктан алып, то­стерлар һәм кер юу машиналары­на кадәр гуманитар ярдәм тулы алты машина озатылды. Курскка булышу йөзеннән 50 мең сум җыеп җибәрдек. Сер түгел, бүгенге көндә безнең авылдан да ир-егетләр алгы сы­зыкта дошманга каршы көрәшә. Сугыш булгач, яралыларсыз да булмый. Шундый хәлләрдә дә без үзебезнекеләрне ташламый­быз, ә адреслы ярдәм оештыра­быз, — ди Татьяна ханым.

— Узган атналарның берсендә төркемебезнең иң актив волонтеры Ильмира Хайретдинова белән зур күләмдә ярдәм туплап, Мулино госпиталендә дәваланучы хәрбиләр янына шәхсән барып чыгарга карар кылдык.

Берничә тапкыр: “Биредә дәваланучы ир-атлар рәхимсез, китергән әйберләрне бер минутта җыеп алалар”, — дип ишеткәнем булды. Әмма барысын үз күзләрем белән күреп, яралы ба­тырларыбыз белән шәхсән аралашкач, мондый имеш-мимешләргә нокта куясым килә — алар килгән кунакларны бик җылы, ниндидер сакчыл хис-тойгылар белән каршы ала. Ә инде килүебезнең максатын белгәч, бүләкләребезне күргәч, олы рәхмәт белдерделәр.

Балаларыбызның җылы теләкләр белән сугарылган хат-рәсемнәрен аеруча җылы кабул иттеләр. Күбесе хәрбиләрнең ка­раваты башында дистәләгән сабыйның эшләре урын алган.

Авылыбыз имамы Рифат хәзрәт Мусин юллаган китаплар да тиз арада үз ияләрен тапты, чөнки без барган көнгә биредә өч дистәдән артык мөселман ке­шесе дәвалана булып чыкты.

Кыскасы, бардык, күрдек, бүләкләребезне тапшырдык, җаныбыз тыныч булырга тиеш кебек, тик… Кул-аяклары, күз-башлары, арка-күкрәкләре зыянланган ир-атлар көненә калырга кемгә дә яз­масын. Алар үз теләкләре белән СВОда катнашмаса, бүгенге тормышыбызны күз алдына да китерү кыен булыр иде. Ә шушы морадыбызга ирешергә, конкерт алганда бушлай транспорт һәм йөртүче белән тәэмин иткән Кызыл Октябрь округы хакимиятенә, шәхсән җирле үзидарә баш­лыгы Рафаэль Ильясовка олы рәхмәтләребезне белдерәбез, — ди Наҗия ханым.

Әмма ләкин СВОга ярдәм белән генә чикләнми алар — мохтаҗларга, авыруларга, янгында зыян күрүчеләргә һәм гомер көзләрендә бала-онык игелегеннән мәхрүм ителгәннәргә дә бу­лышалар. Узган атнада, мәсәлән, тиешле кирәк-яраклар тулы ма­шина белән Уразавыл шәфкать йортында яшәүчеләрне барып сөендергәннәр.

Керем-чыгымнар хисабын алып баручы Наҗия ханым һәр тиенгә, җыелган ярдәм, сатып алынган һәм тапшырылган әйберләргә авылдашлары алдында отчет ясый. Гомумән алганда, чүмбәлилеләр тарафыннан күрсәтелгән ярдәм бүгенге көнгә якынча бер млн сум тәшкил итә.

Игелекле хезмәтләре һәм мәрхәмәтлелекләре өчен чүмбәлилеләр күп тапкыр төрле дәрәҗәдәге Рәхмәт хатлары белән бүләкләнгән.

— Мактанып әйтүем түгел, күп эшлибез. Әмма бу — авылдашларыбызның уртак тырышлыгы. Төп геройлар — Чүмбәли халкы! Аларның һәркайсына исәнлек-саулык, гаилә иминлеге телибез, — ди Кадрия ханым.

«Тамчыдан күл җыела», — дигән төшенчәне истә тотып һәм изге эштән читтә калмыйча, һәркөн игелек кылып яшик. Якты киләчәгебез өчен көрәшкән егетләргә җиңүне якынайтырга бу­лышыйк! Без бергә булганда көчле!

Румия ХАМЗИНА сөйләште

 Түбән Новгород өлкәсе, Чүмбәли авылы