Чирмешән районы үзәгендә яшәүче Марат Минтаһир улы гармуннар җыя. Хәзер аның коллекциясендә егермедән артык гармун, дистәләгән сандык бар.
Ул гармуннарны гаражында матур итеп киштәләргә тезеп куйган. Телле уен коралларының күрер күзгә искеләре дә, буяулары ялтырап торган бик матурлары, яңараклары да бар.
“Минем әти, аның сеңелесе дә гармунда уйныйлар. Безнең өйдә гармун гел бар иде. 2нче сыйныфта укыганда мин дә бераз шыгырдата башладым, – ди Марат. – Аннан, үсә төшкәч, «егетләнә» башлагач, моңа бөтенләй кызыгып киттем”.
