Бүген Бөтендөнья татар конгрессы Башкарма комитеты җитәкчесе Данис Шакиров Белоруссиягә эш сәфәре кысаларында Белоруссия җирләрендә татар-мөселманнар җирлегенең 625 еллыгына багышланган тантаналы чарада катнашачак.

25 ноябрьдә биредә “История татар как живая история Ислама: к 625-летию поселения татар-мусульман на белорусских землях” халыкара фәнни-гамәли конференциясе узачак.

Конференцияне оештыру комитеты хәбәр итүенчә, чара кысаларында Ислам оешмаларының Беларусь һәм БДБ илләре мөселманнарының традицион рухи-әхлакый кыйммәтләрен саклаудагы роле, теология һәм академик фән өлкәсендә советлар чорыннан соңгы киңлектә Ислам гыйлем мәктәбен булдыруга таяныч буларак үткәрелә торган тикшеренүләр, Белоруссия җәмәгатьчелегенең Беларусь татар-мөселманнарының тарихи мәдәни мирасы белән таныштырудагы роле һәм башка мәсьәләләр буенча фикер алышачаклар.