Бүген Әлмәттә Бөтендөнья татар конгрессының Татарстанның көньяк-көнчыгыш районнары бүлекчәләренең чираттагы күчмә утырышы үтә.  Катнашучыларны бай эшлекле һәм мәдәни программа көтә.

Иртәнге сәгатьләрдә кунаклар Кичүчат авылында Ризаэддин Фәхреддин мемориаль музеенда булдылар. Биредә аларны Әлмәт бүлеге җитәкчесе Ландыш Зарипова һәм музей директоры Диләрә Гыймранова сәламләде. Музей буйлап экскурсиядән соң, кунаклар чәй табыны янында аралаштылар.

Көннең икенче яртысында делегация Әлмәт шәһәренә юл тотачак. Биредә делегатлар «Әлмәт» иҗат үзәгендә булачак һәм төрки халыкларның музыка кораллары күргәзмәсе белән танышачак.

Аннары эшлекле программа Габдрахман авылында дәвам итәчәк.  Кунаклар авылның туган якны өйрәнү музеенда булачаклар һәм биредә Бөтендөнья татар конгрессының территориаль бүлекчәләре җитәкчеләренең көньяк-көнчыгыш зона утырышы узачак. Утырышны Бөтендөнья татар конгрессы башкарма комитеты җитәкчесе урынбасары Ирек Шәрипов алып барачак.

Кич белән кунаклар «Нефтьче» мәдәният сараенда «Татар кызы» халыкара конкурсының республика этабының финалын тамаша кылачак.