Бу көннәрдә Башкортстан Республикасының Мишкә районында яшәүче Илгиз Сахил улы Шәкүров үзенең 25 еллык иҗадына багышланган кичәләр үткәрә. Шундый чараларның берсе Уфа шәһәренең “УМПО” Мәдәният сараенда гөрләп узды. Сәхнәдә аның белән бергә Флера Шәрипова, Резеда Әминева, Фәрваз Урманшин кебек республикада танылу алган җырчылар чыгыш ясады.
Илгиз Сахил улы – җырчы, композитор гына түгел, иҗтимагый эшләрдә дә актив катнашучы шәхес. Хәзерге вакытта ул Башкортстан татарлары конгрессының Мишкә районы бүлеген җитәкли.
Юбилярны котларга якташлары, төрле иҗтимагый оешмалардан вәкилләр килгән иде. Алар арасында Бөтендөнья татар конгрессының Башкортстан Республикасындагы вәкиллегеннән Алик Локманов белән Әльмира Ногманова да бар иде. Алар Илгиз Шәкүровны иҗади уңышлары белән котлап чыгыш ясады һәм бүләккә китаплар тапшырды.
