Үткәннәрне онытмыйк — авылыбыз тарихын саклыйк!
Бөек Җиңү бәйрәме алдыннан Олы күл авылы егете Альфред Бикбулатов башлангычы белән илебезнең батырлык тарихын өйрәнүгә һәм яшьләрдә туган якка мәхәббәт тәрбияләүгә юнәлтелгән проект тормышка ашырылды.
Авыл тарихы — үткән, бүгенге һәм киләчәк турында бәяләп бетергесез мәгълүмат чыганагы. Бу җирдә яшәгән һәм хезмәт куйган кешеләр турында хәтерне саклау — уртак мәдәни мирасыбызны кадерләп саклау дигән сүз.
Бер ел дәвамында Альфред Вәлиәхмәт улы зур тырышлык белән эш алып барды: авылдашларның фотоларын һәм истәлекләрен җыйды, архивлардан тарихи фактларны ачыклады. Иң катлаулы һәм җаваплы этап — хәзер авыл үзәген бизәп торучы «Хезмәт даны» истәлек баннерын булдыру өчен материалларны тәртипкә салу булды.
Экспозиция беркемне дә битараф калдырмады. Авылдашлар һәм бәйрәм кунаклары дулкынланып үзләренең туганнарын, дусларын һәм үзләрен фотоларда таныдылар. Баннерда гади хроника гына түгел, ә Олы күл авылының тере тарихы чагылыш тапкан: авылга нигез салучылар, рухи җитәкчеләр, укытучылар, администрация вәкилләре.
Монда дистә еллар буе авыл тормышын төзегән кешеләр урын алган: социалистик хезмәт алдынгылары, хат ташучылар, сатучылар, тегүчеләр, электриклар, шоферлар, бозау караучылар, көтүчеләр, тимерчеләр, төзүчеләр, терлекчеләр, игенчеләр, балыкчылар, медицина хезмәткәрләре, ветеринарлар, дәвалаучылар, мәдәният хезмәткәрләре, сөт эшкәртү цехы һәм кошчылык фермасы эшчеләре.
Моннан тыш, Альфред Вәлиәхмәт улы Россиянең әһәмиятле шәһәрләренә кадәр булган араны күрсәтүче тарихи чакрым баганасы урнаштырды. Ул авылның тагын бер истәлекле урынына әверелде. Олы күл авылы яныннан Екатерина чорындагы Бөек Себер тракты узган. Бу юлдан декабристлар һәм сөргенгә җибәрелгән кешеләр ерак Иркутскига таба юл тоткан. Әлеге юлдан Антон Павлович Чехов һәм Александр Николаевич Радищев та узган.
Бәйрәм көнендә хәрби атрибутика күргәзмәсе дә эшләде. Килүчеләр төрле еллар һәм гаскәр төрләренең хәрби формаларын, шулай ук төрле буын солдатларының шәхси әйберләрен күрә алдылар. Альфред Бикбулатов гаиләсенең кадерле ядкарьләре — аның Беренче бөтендөнья сугышында катнашкан бабасының кашыгы һәм казанчыгы — аеруча зур кызыксыну уятты. Кулдан кара һәм төсле карандашлар белән ясалган, әсир кешегә караган 40 нчы еллар картасы да күпләрнең игътибарын җәлеп итте.
Үсеп килүче буын турында да онытмадылар: яшьләр өчен Ватан тарихына багышланган викторина һәм тематик уеннар оештырылды. Барлык катнашучылар да татлы һәм файдалы бүләкләр алды.
Туган як тарихын белү — ул туган җиргә һәм янәшәңдә яшәүче кешеләргә рәхмәт белдерү дигән сүз. Онытмыйк: үткәнсез бүгенге һәм киләчәк юк!
Фатыйма Раенбагина
