Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразыев эш сәфәре белән Самара өлкәсенә юл тотты. Сәфәр кысаларында Милли Шура рәисе традицион рәвештә үткәрелә торган һәм өлкәдәге татарларның иң зур очрашу мәйданы булып торган Өлкә Сабантуенда катнашачак.
Чара 20 июньдә Самараның Ю.А.Гагарин исемендәге мәдәни һәм ял паркында уза.
Васил Шәйхразыев милли бәйрәм кунакларын Татарстан җитәкчелеге исеменнән котлаячак. Шулай ук аның урындагы татар милли-мәдәни оешмалары вәкилләре белән очрашуы көтелә.
