Пермьнең “Гүзәл Чулман” татар бию ансамбле Венгрия һәм Сербиядә халыкара фольклор фестивалендә катнаша.
“Гүзәл Чулман” ансамбле Пермь шәһәрендә бердәнбер татар яшьләре бию коллективы. 7 ел дәвамында биючеләр Россиянең төрле төбәкләрендә үтә торган фестивальләрдә генә түгел, чит илләрдә дә чыгыш ясый. 2015 елда Гөлүзә Хамзина җитәкчелегендәге “Гүзәл Чулман” татар ансамбле Италиядә халыкара фольклор фестивалендә катнашкан. Быел исә, 12-22 август көннәрендә Венгриядә, 22-26 августта Сербия сәхнәсендә татар мәдәниятен күрсәтәчәк. Бу хакта “Гүзәл Чулман” ансамбле Бөтендөнья татар конгрессына хәбәр итте.
