Рәҗәб аеның 17-нче көнендә (12-нче мартта), Казанда мөслимәләр өчен “Яшь килен” проектының икенче сезоны башланды. Кич белән Галиев мәчетендә беренче очрашу – проектта катнашучы кызлар белән танышу кичәсе узды. Беренче утырышка кырыкка якын мөслимә җыелды. ТР мөселманнары Диния нәзарәтенең социаль бүлек җитәкчесе Айгөл ханым Биктимерова һәм проектның кураторлары алар белән беренче әңгәмә уздырды.
Шунысы игътибарга лаек, проектның яңа сезоны кызларны яңа формат белән сөендерде. Әгәр сез башка шәһәрдән булсагыз, хәзер “Яшь килен” проектында онлайн режимда да катнашырга мөмкин. Шулай итеп, Казанда яшәүче оффлайн катнашучылардан тыш, яңа сезонда Мәскәү, Чиләбе, Кемерово, Уфа, Екатеринбург, Нижневартовск, Чаллы шәһәрләреннән, Балтач, Алексеевск, Теләче, Чистай, Азнакай районнарыннан барлыгы алтмыштан артык кыз катнашачак.
Ике ай дәвамында кызлар өчен никах, әни булу серләре, психология, хуҗалык эшләрен алып бару темаларына багышланган 7 оффлайн-очрашу һәм никах килешүе, физиология, аерылышу һ.б. темаларга багышланган 6 онлайн-дәрес узачак. Сәламләү сүзләреннән соң һәм катнашучыга “Яшь килен” көндәлекләрен бүләк иттеләр. Әлеге дәфтәрләр ярдәмендә кызлар өй эшләрен башкарачак һәм даими файдалы эшләр трекерын теркәп барачак.
“Яшь килен” проектының киләсе очрашуы 19-нчы мартта узачак, анда катнашучыларга ничек итеп тормыш иптәшен дөрес сайлау турында сөйләячәкләр.
“Яшь килен” проекты мөселман яшьләре арасында гаилә кыйммәтләрен ныгыту максатыннан гамәлгә ашырыла, шәригать һәм татар милли гореф-гадәтләр күзлегеннән чыгып никах темасының төрле мәсьәләләренә багышлана. Очрашулар һәм видеодәресләрдә булачак һәм хәзерге яшь киленнәргә милли традицияләр – бәби чәе, бишек җыры, кыз озату һ.б., никахның дини һәм хокукый яклары, ир-атның һәм хатын-кызның вазифалары һәм хокуклары, мәһер һәм никах килешүе, хатын-кыз һәм ир-ат психологиясе кебек мәсьәләләр турында сөйләнәчәк. Моннан тыш, мөслимәләр милли ашлар әзерләргә, бала карарга, кунакларны каршыларга өйрәнә алачак. Спикерлар сыйфатында психологлар, юристлар, табиблар, галимнәр чыгыш ясаячак. Курслар һәр атна саен Галиев мәчетендә 18:30-да уза. Йомгаклау дәресе 30-нчы апрель көнне ифтар форматында булачак. Шунысы игътибарга лаек, проектта катнашучыларның яше чикләнмәгән.
