15 декабрьдә Кәтринбурда, Татарстанның Свердловск өлкәсендәге Даими вәкиллеге бинасында, “Акыл фабрикасы” узды. Чараны Бөтендөнья татар яшьләре форумы, ЯШЕН яшьләр үзәге һәм Татарстанның Даими вәкиллеге бергәләп оештырды. Интенсивта Свердлау, Төмән, Чиләбе өлкәләреннән һәм Пермь краеннан яшьләр катнашты. Чараның төп максаты – татар яшьләре өчен аралашу мәйданчыгын булдыру, милли проектларны үстерү һәм яңа идеяләрне туплау иде.

Программада татар яшьләре форумының проектлары тәкъдим ителде, төбәкләрдә татар мохите булдыру, үзаңны саклау һәм үстерү турында фикер алышулар булды. Катнашучылар ясалма фәһем куллану, социаль проектлар булдыру һәм милли контент булдыру серләрен өйрәнделәр. Моннан тыш, тарихи татар урыннарына экскурсия һәм шәҗәрә төзү сәнгате буенча остаханәләр оештырылды. Интенсив музыкаль кичә белән тәмамланды.

Чара нәтиҗәсендә катнашучылар яңа проектлар концепцияләрен эшләде. Чиләбе, Кәтринбур һәм Пермь өчен аерым мәдәни фестивальләр – “Галеев фест”, “Агафуров фест” һәм “Җиһанша фест” тәкъдим ителде. Бу интенсив яшьләр арасында татар мәдәниятен тану һәм аны үз төбәкләрендә үстерүгә этәргеч бирүче мөһим адым булды.

Чыганак: Бөтендөнья татар яшьләре форумы