«Сәйдәш» мәдәният үзәгендә «Донбасска хат» хәйрия концерты узды. Концертны Татарстан Республикасы Мәдәният министрлыгы, Казан шәһәре «Актаныш» якташлар җәмгыяте һәм Актаныш районы администрациясе оештырды.

Чарада Татарстан халык артистлары Асаф Вәлиев, Азат Тимершәех, Кирам Сатиев, республиканың атказанган артистлары Артур Исламов, Газинур Фарукшин, Илгизәр Исламов, Фәрит Мирзануров һәм башка танылган җырчылар катнашты. Кичәдә «Агыйдел» дәүләт җыр һәм бию ансамбле, «Риваять» этно-төркеме һәм яшь башкаручылар чыгыш ясады. Концертны Гөлназ һәм Илсур Шәрипҗановлар алып барды.

Концерт инде дүрт ел рәттән зур масштабта оештырыла. Бу хакта «Татар-информ» хәбәрчесенә чараның төп оештыручысы, Казандагы «Актаныш» якташлар җәмгыяте җитәкчесе Вәсим Вахитов сөйләде.

«Казандагы «Актаныш» якташлар җәмгыяте инде дүрт ел рәттән махсус хәрби операциядә катнашучы якташларыбызга ярдәм итү өчен хәйрия концерты оештыра. Чараның төп максаты – республикабыздан, Актаныш районыннан хәрби операциягә киткән егетләргә матди ярдәм күрсәтү. Без аларга барлык кирәк әйберләрне машиналарга төяп районнан үзебез илтеп бирәбез. Ярдәм составына азык-төлек продуктлары, көндәлек кирәк-яраклар керә, хәрбиләрнең үзләренең дә мөрәҗәгатьләрен исәпкә алабыз», – дип сөйләде ул.

Концерт программасында ел саен Татарстанның халык, атказанган артистлары белән беррәттән район үзэшчәннәре дә катнаша.

«Актнышта туып-үскән, мәдәнияткә үз өлешен керткән артистларыбызны чакырабыз. Чараның программасы бик көчле. Шунысы сөендерә – зал шыгрым тулы иде. Концертта төрле уеннар да үткәрелде. Программада шулай ук махсус хәрби операциядә катнашкан егетебез дә катнашты. Концертка хәрби операция зонасында һәлак булган хәрбиләрнең якыннарын чакырдык. Аларга иганәчеләребездән бүләкләр тапшырылды. Бу эшне теләп эшлибез. Без бер-беребезгә ярдәм итеп яшәргә тиеш», – дип ассызыклады Вәсим Вахитов.

«Риваять» этно-төркеме җитәкчесе Руслан Габитов традициягә әйләнгән хәйрия концерты актанышлыларны барлаучы чара да булып тора, дип билгеләп үтте.

«Һәр елны читтән бер кеше дә чакырмыйча, үз көчебез белән, районнан чыккан артистлар, район үзешчәннәре белән концерт оештырабыз. Концертка Казанда яшәүче якташларыбыз килә, күрешә, очраша, аралаша. Бу бик мөһим. Тамаша һәр елны бик җылы мөгаләмәдә уза – җыр-биюләр, ихлас кул чабулар. Бу – райондашлар белән хәбәрдар булып торырга ярдәм итә. Безнең олпат, өлкән җырчыларның сәхнәгә чыгуы үзе бер шатлык. Әлеге кичә хәйрия концерты гына түгел, үзебезнең якташларны барлаучы чара да», – дип сөйләде ул.

Җырчы Илнар Ялалов әлеге концерт өчен махсус җыр яздыруы турында сөйләде.

«Концерт бик яхшы узды. Зал һәрвакыттагыча тулы булды. Матур атмосфера, җылы алкышлар. Оештыручы Вәсим абый Вахитов җиренә җиткереп эшли, егетләребезгә ярдәм итү өчен ел саен шундый матур кичә ясый. Бу бик зур, авыр хезмәт. Аңа әлеге эше өчен рәхмәтләребезне җиткерәбез. Мин әлеге концерт өчен махсус «Аналар өмете» дигән җыр яздырдым. Аның сүзләренең авторы – танылган шагыйрә Гөлсәрвәр. Җыр әлегә музыкаль мәйданчыкларда чыкмады. Мин аны әлеге концертта беренче тапкыр башкардым. Халык бик җылы кабул итте. Җыр хәрби операциядә катнашучы егетләребезгә багышлана. Музыкаль мәйданчыкларда киләсе атнада тыңлап булачак», – дип искәртте җырчы.

Актаныш районы башлыгы Ленар Зарипов социаль челтәрләрендә барлык катнашучыларга рәхмәт белдерде.

«Якташларыбыз Казан тамашачысына бик матур хәйрия концерты тәкъдим итте. Бу игелекле эшне оештыручы олы йөрәкле якташыбыз Вәсим Вахитовка, барлык якташларыбызга, «Агыйдел» дәүләт жыр һәм бию ансамбле коллективына, район мәдәният хезмәткәрләренә, «Баламишкин» гармунчылар ансамбленә һәм, гомумән, игелекле эшкә өлеш керткән барлык милләттәшләребезгә ихлас рәхмәт белдерәм!», – дип язган ул.

Чыганак: tatar-inform.tatar