Әгерҗенең Таҗи Гыйззәт ис. 3нче мәктәбендә чара үтте. Анда 1нче гимназия, 2, 3нче, Иж-Бубый мәктәпләре укучылары “Аулак өй – көрәш” республика проектының район этабында катнаштылар.
Конкурсның төп максаты – милли мирасны баету һәм популярлаштыру, татарның үзенчәлекле мәдәниятен пропагандалау һәм саклау, үсеп килүче буынны татар әдәбияты классиклары әсәрләрен укырга җәлеп итү.
Проектның авторы Сәрия Җиһаншина командаларга бөек шагыйрь Габдулла Тукайның тормыш юлы һәм иҗатына багышланган биремнәр әзерләп алып килгән. Укучылар таныштыру биремен үтәделәр, сүзләрдән шигырь җыйдылар, “Йөзек салыш” уенында катнаштылар, борынгы йолаларны күрсәттеләр.
Милли киемнәрдән татар телендә чыгыш ясаган балаларның осталыклары югары бәяләнде.
Беренче урыннарны 3нче шәһәр һәм Иж-Бубый мәктәпләре алды.
Икенче урында – 1нче гимназия һәм 2нче мәктәп командалары.
Чыганак: agryz-rt.ru
