21 июньдә Ульяновск өлкәсенең Иске Майна округындагы «Болгар Заставасы» тарихи-мәдәни комплексында Бөтенроссия «Татар азаны» конкурсы узды. Чараны оештыручылар –  Бөтендөнья татар конгрессы, Татарстан Республикасының «Рухи моң» иҗат берләшмәсе, «Сембер» өлкә татар эшмәкәрләре иҗтимагый оешмасы һәм «Садака» хәйрия фонды.

Конкурста балалар (7-13 яшь) һәм өлкәннәр катнашты. Быел призлы урыннарның күбесенә Татарстан вәкилләре лаек булды. Балалар номинациясендә төп бүләк — электровелосипедны Пенза өлкәсеннән 8 яшьлек Әхмәт Бибарсов алды. Өлкәннәр арасында гомрә сәфәренә юллама Әлмәттән 34 яшьлек Ришат Сафинга насыйп булды.

Жюри составында Казанның Вахитов һәм Идел буе районнары имам-мөхтәсибе Йосыф хәзрәт Дәүләтшин, Ульяновск өлкәсе мөселманнары Диния нәзарәте Голәмәләр шурасы рәисе, «Биләр» мәдрәсәсе ректоры Ильяс хәзрәт Тлявлин, шулай ук Россия Үзәк диния нәзарәтеннән Тәлгать Таҗетдин вәкилләре һәм башка хөрмәтле дин әһелләре бар иде.

Номинация финалистлары жюри каршында азан әйтеп күрсәттеләр. Конкурс Россиядә Халыклар бердәмлеге елы уңаеннан үтте һәм 20 төбәктән катнашучыларны җыйды. Кунаклар өчен милли аксессуарлар ясау,  уенчыклар ясау һәм милли стильдә тәлинкәләр бизәү буенча мастер-класслар оештырылды. Барлык теләүчеләрне пылау һәм чәй белән сыйладылар, балалар өчен уен мәйданчыклары эшләде. Атмосфера гаилә бәйрәменеке кебек булды.

«Конкурс икенче тапкыр уза. Быел катнашучылар саны күбрәк, балалар номинациясе дә барлыкка килде — шулай итеп без азан турында белемнәрне буыннан-буынга тапшырабыз. Гаиләләрнең килүен күрү шатландыра. Чара фестивальгә әйләнеп бара. Катнашучылар санын арттыру өчен яңа дәрәҗәгә чыгу теләге бар», — дип шәрехләде «Сембер» бизнес-клубы президенты Эльмира Алиакберова.