Бүген Казан шәһәренең «Чулпан» мәдәни үзәгендә «Әпипә» Бөтенроссия үзешчән коллективларның татар халык биюе телевизион бәйгесе нәтиҗәләре ясалды.

«Әпипә» Бөтенроссия үзешчән коллективларның татар халык биюе телевизион бәйгесе быел икенче тапкыр уздырыла. Татарстан Республикасы  районнарыннан һәм Россия Федерациясенең унҗиде төбәгеннән бәйгедә катнашу өчен 78 гариза кабул ителде. Барлык катнашучылар саны – 820. Россия төбәкләре бәйгедә аеруча актив катнашты. Гаризалар Санкт-Петербург, Томск, Пермь, Чиләбе, Марий Эл, Башкортостан, Свердловск, Удмуртия, Чувашия, Оренбург, Мордовия, Киров, Пенза, Калининград, Түбән Новгород төбәкләреннән килде. Шулар арасыннан 14 коллектив финалга узды.

Финалга чакырылган коллективлар мәртәбәле жюри каршында чыгыш ясады. Һәр чыгыштан соң ук жюри белән күзгә-күз ачыктан-ачык сөйләшү, чыгышны бәяләү форматында аралашу булды.

Чарада Бөтендөнья татар конгрессы Башкарма комитеты җитәкчесе Данис Шакиров катнашты. Ул бәйгедә катнашучыларны, кунакларны сәламләде һәм татар биюенең уникаль сәнгать төре булуын ассызыклады.

– Татар биюе халкыбызның гасырлардан гасырларга күчеп килгән мирасын, тарихын, мәдәниятен чагылдыра. Татарстаннан читтә яшәп иҗат итүче коллективларыбыз өчен без Казан мәйданнарында чыгыш ясау өчен мөмкинлекләр бирәбез. Алар үз иҗаты белән Казан тамашачысын шаккаттыра. Аерым ассызыклыйм, биредә профессиональ коллективлар җыелмады, алар барысы да үзешчән коллективлар. Алар татар биюен үзләренең җирлекләренә хас булганча күрсәтә беләләр. Катнашучыларга зур рәхмәтләремне җиткерәм, – диде Данис Шакиров.

Бәйге нәтиҗәләре буенча, «Гүзәл Чулман» татар халык бию ансамбле (Пермь) Гран-при иясе дип танылды.  Беренче урынны – «Акбузат» халык биюе үрнәк ансамбле (Башкортстан Республикасы, Илеш районы), икенче урынны – «Мирас» үрнәк бию ансамбле (Татарстан Республикасы, Казан шәһәре), өченче урынны «Умырзая» халык хореография ансамбле (Чиләбе өлкәсе) алды.

«Әпипә» Бөтенроссия үзешчән коллективларның татар халык биюе телевизион бәйгесе татар конгрессы Башкарма комитеты, Татарстан Республикасы Мәдәният министрлыгы, «Татарстан-Яңа гасыр» телеканалы белән берлектә 2022 елда икенче тапкыр уздырыла. Бәйге Татарстан Республикасының «Татар халкының милли үзенчәлеген саклау» дәүләт программасы кысаларында оештырыла.