Бүген III Бөтендөнья татар хатын-кызлары съезды делегатлары Г. Тукай һәйкәленә чәчәкләр салу тантанасында катнашты.

Чарада шулай ук Бөтендөнья татар конгрессы Башкарма комитеты җитәкчесе Данис Шакиров һәм Бөтендөнья татар хатын-кызлары иҗтимагый оешмасы рәисе Кадрия Идрисова катнашты.

– Быел Габдулла Тукайның тууына 137 ел. Ул милләтебезнең бөек улы. Бүген бөтен дөньядан җыелган гүзәл затларыбыз белән бергә Габдулла Тукаебызның һәйкәленә чәчәкләр салу – зур бәхет һәм горурлык, – диде Бөтендөнья татар конгрессы Башкарма комитеты җитәкчесе Данис Шакиров.

Чәчәкләр салу тантанасында катнашучылар “Туган тел” җырын башкардылар, съездны югары дәрәҗәдә һәм һәр хатын-кызга файдалы булырдай итеп оештырган өчен рәхмәтләрен җиткерделәр. Шулай ук алар күңел түрендә йөрткән иң матур теләкләрен, милләтебезгә булган хөрмәт һәм мәхәббәтләрен шигъри юлларга салып сөйләделәр.