19 нчы июньдә Казанда Сабантуй өч мәйданчыкта узачак: Мирный һәм Дәрвишләр поселокларындагы каенлыкларда, Аккош күле буендагы урман паркында. Шәһәр халкы татар йорты корылмаларында була һәм халык уеннарында катнаша ала, ә концерт программасын Эльмира Кәлимуллина, Ришат Төхвәтуллин, Зәйнәп Фәрхетдинова, Зөфәр Билалов, Ландыш Нигъмәтҗанова, Зинира һәм Ризат Рамазановлар бизәячәк. Гадәттәгечә бу көнне ипподромда бәйрәм уңаеннан уздырыла торган ат чабышлары булачак.
«Без халкыбызны характерлаучы милли традицияләргә нык таянабыз. Нәкъ менә алар – республика халкы бик ярата торган Сабантуй бәйрәменең нигезе. Без 19 нчы июньдә бәйрәм матур һәм күңелле узсын өчен барысын да эшләргә тырышачакбыз. Безне алда зур оештыру эшләре көтә», – дип билгеләде ТР башкаласы Мэры Илсур Метшин бүген Казан шәһәре Башкарма комитетында узган эшлекле дүшәмбе вакытында.
Бүләкләр җыю, халык уеннары һәм көрәш Казан Башкарма комитетының Мәдәният идарәсе башлыгы Азат Абзалов сүзләренә караганда, бәйрәмгә әзерлек ахыргы стадиягә якынлаша. «Без тамашачылар трибуналарын, чатыр һәм сәхнә җиһазларын монтажлауга керешәбез», – дип хәбәр итте ул.
Бәйрәм алдыннан, 17 нче июнь көнне, шәһәрдә Сабантуйга традицион бүләкләр җыю булачак. Җигүле арбалар берничә ноктадан – Казан Кремленнән, Муса Җәлил исемендәге опера һәм балет театрыннан, «Туган авылым» комплексыннан, Иске Татар бистәсеннән 11:00 сәгатьтә кузгалачак. Теләгән кешеләр аларга үзләренең бүләкләрен тапшыра алачак. Соңыннан барлык арбалар Г.Камал театры каршындагы мәйданга җыелачак, анда фольклор коллективлары катнашында концерт булачак.
Сабантуй 18 нче июньдә Казан ипподромында ат чабышлары белән дәвам итәчәк. Программада 14 чабыш һәм заезд, сәнгать осталары концерты, лотерея һәм салют каралган. Башлана 16:30 да.
19 нчы июньдә 9:30 да төп бәйрәм өч мәйданчыкта – Мирный һәм Дәрвишләр поселокларында, Аккош күле урман-парк зонасында башланып китәчәк. Казанлылар аркан тартышу, чүлмәк вату, капчык киеп йөгерү, баганага үрмәләү, мендәрләр белән сугышу, милли көрәш кебек уеннарда көч сынаша алачак.
Бер үк вакытта Сабантуй Дәрвишләр бистәсендә һәм Аккош күле буендагы урман паркында да башланачак. Әлеге мәйданчыкларда шулай ук татар артистлары, биючеләре һәм иҗат коллективлары чыгыш ясаячак. Халык күңел ачуларын милли костюмнар кигән һөнәрчеләр төрләндерәчәк. Милли көрәш буенча ярышларда республиканың иң яхшы батырлары катнашачак. Җиңүчеләрне һәм призерларны кыйммәтле призлар белән бүләкләячәкләр, ә абсолют батырларга бәрән һәм квадроцикл вәгъдә итәләр.
Теләгән һәркем үзен милли конкурсларда һәм ярышларда сынап карый алачак, алар арасында – гер күтәрү, баганага менү, бүрәнә кисү, чүлмәк вату, көянтә белән йөгерү, кашыкка йомырка салып йөгерү, катык салынган савыттан акча эзләү, аркан тарту һәм башкалар. Нәни килүчеләр өчен махсус балалар программалары әзерләнәчәк. Дәрвишләр бистәсендәге концерт программасының йолдызлары Ришат Төхвәтуллин һәм Эльмира Кәлимуллина булачак.
Барлык бәйрәм мәйданчыклары да якынча 16:00 сәгатькә кадәр, абсолют батырлар билгеле булганчы эшләячәк.
