Милләтебезгә хөрмәт гореф-гадәт, йолаларны, телебезне өйрәнүдән, аны кабул итүдән башлана. Шуны истә тотып Сургут шәһәре иҗтимагый татар милли мәдәни мохтарияты ел дәвамында татар җанлы милләттәшләр белән берлектә бик күп санлы милли-мәдәни чаралар уздыра. Тик менә илебезгә килгән яман “таҗлывирус”кына аларның эшчәнлеген бераз туктатып тора. Алай дип әйтү дә дөрес үк булмас, Сургут татар яшьләр берлегендә “Татар теле” онлай-дәресләрен даими үткәрә, “Сандугач” җыр-бию ансамбле дә онлайн-конференцияләр үткәреп, алга карап, киләчәккә планнар кора. “Ак калфак”лы ханымнар кич утырып бер өстәл артында булмаса да, бергәләп онлайнда, бер-берсе белән киңәшләшеп кул эшләре эшлиләр. Кыскасы, Сургут татарлары вакытларын бушка уздырмый. Җаен табып тегү-чигү, бәйләм бәйләү, пешеренү, аш-су серләренә бергәләп өйрәнәләр. Кайсы да хөрмәткә лаек. Шулай булгач, оешмага кушылган һәркем халкыбызның йолаларын саклап калып, аны яшь буынга тапшыру өстендә зур тырышлык күрсәтә. Менә бит күптән түгел генә уздырылган концертлары да аларның гади гына концерт түгел, ә халкыбызның “Туй йоласы”на нигезләнеп эшләнгән. Әйдәгез, бергәләп карыйк. Арыган, талчыккан күңелләргә бераз ял булсын әле!

Гөлчәчәк Фәтхулова, ХМАО-Югра