20 июньдә Казанда Сабантуйда танышу һәм аралашу өчен махсус яшьләр мәйданчыгы ачылачак. Проектны «Идел» журналы редакциясе шәһәрнең Мәдәният идарәсе белән берлектә әзерләгән.

Оештыручылар милли бәйрәм традицияләренең берсен яңартырга тели. Борынгы заманда яшьләр Сабан туйларында һәм аулак өйдә танышканнар, дуслар тапканнар һәм гаилә корганнар.

Казан Башкарма комитетының Мәдәният идарәсе җитәкчесе Алия Заһидуллина сүзләренә караганда, проектның төп максаты – милли гореф-гадәтләрне саклап калу һәм аларны заманча яшьләр өчен җайлаштыру.

Кунаклар өчен тиз очрашулар, интерактив зоналар, халык уеннары, гаилә һәм гаилә кыйммәтләре турында дискуссияләр, диджей-сет һәм татар дизайнерлары ярминкәсе әзерләнәчәк.

Төп мәйданчыкларның берсе кыска очрашулар зонасы булачак, анда катнашучылар тиз күрешү форматында аралаша алачак. Шулай ук танышу тактасы да эшләячәк: теләүчеләр анкета тутыра, фотога төшерә һәм үзләре турында мәгълүмат урнаштыра алачак.

Яшьләрне фотозона һәм традицион татар уеннары, шул исәптән «Йөзек салыш», парлы биюләр һәм башка чаралар көтә.