Идел буе татарларының Кырымдагы “Идел” ассоциациясе 2014 елның 14 мартын бәйрәм көне итеп истә калдырачак. Чөнки бу көнне эфирга күптән көтелгән татарча радиотапшыру чыкты.
Беренче тапшыру Бөтендөнья татар конгрессы эшчәнлегенә багышланган иде. Студия кунагы – Бөтендөнья татар конгрессы Башкарма комитеты рәисенең беренче урынбасары Ренат Вәлиуллин булды.
Тапшыруларны Казан дәүләт университетын тәмамлаган Хәлидә Әхмәтҗанова алып бара. Алар Транс-М-радиоканалында чыгачаклар. Әлеге радиостанция 20 ел эфирда эшли һәм бөтен Кырым территориясендә ишетелә.
Инде һәр җомга җирле вакыт белән кичке җидедә ралиоалгычларны 102,3 FM, 104,1 FM, 105,3 FM, 107,1 FM ешлыкларына көйләп татар тапшыруын тыңлап булачак.
