Яңа егерме беренче гасыр башында илебезнең күпләп милләттәшләребез яши торган байтак өлкәләрендә төбәк тарихы, андагы танылган шәхесләр һәм дини тормышыбызга кагылышлы фәнни-гамәли конференцияләр уздыру матур гадәткә әйләнде. Хәзер ел саен Түбән Новгородта “Сафаҗәй”, Төмәндә “Сөләйманов”, Чувашиядә “Гыйбатдинов укулары” үтә. Ә Ульяновск өлкәсендә “Хансөяров укулары” дип башланган әлеге чараны семберлеләр узган ел аңа нигез салучы, илкүләм танылган иганәче Эдуард хаҗи Ганиев исеме белән оештыра башладылар. Аның туган ягы Иске Кулаткыдагы быелгы укулар “Эдуард хаҗи үрнәгендә татар хәйриячелеге” дигән исем астында үтте.