30 октябрь көнне Берләшкән Гарәп Әмирлекләренең Дубай шәһәрендә Бала-Сити мәктәбе ачылды. Шулай ук әлеге уку йорты кысаларыда Татар теле һәм мәдәнияте үзәге дә булдырылды. Биредә балалар татар телен, әдәбиятын, мәдәниятен һәм тарихын өйрәнә алачак.

“Бала-Сити” уку йортының төп җитәкчеләре, әлеге проектның авторлары һәм әйдәп баручылары – Альбина һәм Динар Насыйровлар гаиләсе.

Татарстан Республикасы Дәүләт Советы рәисе урынбасары Марат Готович Әхмәтов, Татарстан Республикасы Дәүләт Советы депутаты, Бөтендөнья татар конгрессы башкарма комитеты җитәкчесе Данис Фәнис улы Шакиров һәм шулай ук Бөтендөнья татар конгрессы Милли Шурасы әгъзасы Фәхретдин Бәдретдин улы Канюкаев та ачылыш тантанасында катнашты.

Данис Фәнис улы Республика һәм Бөтендөнья татар конгрессы исеменнән кунакларны сәламләде, яңа уку йорты ачылышы белән котлады, истәлекле бүләкләр һәм рәхмәт хатлары тапшырды. Шулай ук, Бөтендөнья татар конгрессы исеменнән мәктәп китапханәсенә татар телендә китаплар бүләк ителде.

Чара кысаларында татар тарихы һәм мәдәниятенә кагылышлы зәвыклы күргәзмә дә ачылды.