Бүген «Корстон» сәүдә-күңел ачу үзәгендә Бөтендөнья татар конгрессының Милли Шура утырышы узды. Утырыш барышында Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Милли Шура составына түбәндәге үзгәрешләрне тәкъдим итте.

Октябрь аенда вафат булган танылган кардиохирург Ренат Акчурин урынына Россия Герое Рөстәм Сәйфуллин, Бөтендөнья татар конгрессының Милли Шура рәисе урынбасары Дания Заһидуллинаның үз рәсми вазифасын туктату сәбәпле аның урынына Татарстан Республикасы Рәисе каршындагы Мәдәниятне үстерүгә ярдәм фонды башкарма директоры Нурия Хашимова һәм Ленария Мөслимова урынына – Бөтендөнья татар яшьләре форумы рәисе РайнурХәсәнов кандидатурасы  бертавыштан хупланды.