Изге Рамазан аенда ураза тоткан кешеләр кояш баегач су һәм җимеш белән авыз ачалар. Менә Самараның татар мәктәбе укучыларының ата-аналары, балалары, татар мил­ли гореф-гадәтләрен өйрәнү белән беррәттән, ислам дине кагыйдәләре белән дә танышсыннар өчен массакүләм иф­тар мәҗлесе үткәрергә ният иттеләр.

Шунысын да билгеләп үтәргә кирәк, мондый чара әлеге уку йортында беренче мәртәбә уздырылды. Оештыручылар мәктәптә чын бәйрәм атмосферасы булдырырга тырыштылар. Холл баннерлар һәм тематик фотозона белән бизәлгән, аның янында балалар һәм әти-әниләре фотога төшәләр. Ир балалар түбәтәйләр киеп, кызлар ак яулыклар бәйләп коридорларда йөренәләр, кай­­чакта онытылып, йөгереп тә китәләр, малайлар, ата-аналары күрмәгәндә, төрт­кәләшеп тә алалар. Ниш­лә­тәсең, балалар бит әле. Иң мө­һиме, һәрнәрсәдә күтә­рен­ке кәеф һәм ниндидер серле, якты рух сизелә.

Спорт залында кунак­лар өчен барысы да әзер ин­де. Залга керүчеләрне Рама­зан ту­рында сөйләүче төс­ле бан­­нерлар каршы ала, һәр­кем өчен сулы шешәләр әзер­лән­гән, чараны алып баручылар тавыш кө­чәйт­кеч­ләрен көй­ләп бете­рәләр…

Барысы да урнашып бет­кәч, беренче сүз мәктәп директоры Радик Газизовка бирелде. Дөрес, балаларны тынычландыру өчен бераз вакыт кирәк булды. Күп тә үтмәде, барысы да шып булды. Татар мәктәбендә тәрбия мәсьәләләренә игътибар зур булуы сизелеп тора. Радик Рәвгатович барысын да як­ты Рамазан ае белән котлады һәм илебезгә – иминлек, балаларга – игелек һәм якты омтылышлар, ата-аналарга күңел тынычлыгы теләде.

Ифтарда катнашучыларны төбәк Диния нәзарәте рәи­се, мөфти Талип хәзрәт Ярул­лин да сәламләде. Ул барыбызны да мөбарәк Рамазан ае белән котлап, балаларга шушы изге айда ислам динендәге биш багананың берсе булган ураза тоту рә­вешен аңлатты. Тәүлекнең якты вакытында ашау-эчү­дән тыелып тору, биш намазны укыгач, тагын Коръән аятьләре дә укып, күңел­лә­рендә юмартлык һәм яр­дәмчеллек сыйфатлары тәр­бияләү өчен ярлы һәм авыру кешеләргә сәдака бирү яисә ничек тә булса ярдәм итү мөһимлеге, уразаның игелекле эшләргә, изге гамәлләргә өндәве, укы­ган догаларның Аллаһы Тә­галәгә барып җи­түе турында сөйләде.

Мәктәп ифтарында катнашучылар өчен дин темасына багышланган конкурслар үткәрелде, дини шигырьләр һәм җырлар яңгырады.

Авыз ачканнан соң кунак­ларны хуш исле пылау, чәй һәм тәм-томнар белән сыйладылар.

Данияр Сәйфиев

“Бердәмлек” газетасы