2023 елның 28 апрелендә Казанда XII «Идел» фестиваленең чираттагы гала-концерты узды. Программада шулай ук жюри әгъзалары да катнашты.

Чара Бөтендөнья татар конгрессы, Татарстан Республикасы Мәдәният министрлыгы, «ПАКЕР» НПФ, «Татнефть» ГАҖ, «Фармленд» Аптека челтәре ярдәмендә оештырылды.

Концертта “Идел” татар һәм башкорт җырлары фестивале лауреатлары: Рафис Сирусин, Алмас Хөсәенов, Гөлшат Гыйрфанова, Руслан Габбасов, Дамир һәм Нәргия Таиповлар, Әлфия Мурзабаева, Алсу Идрисова, “Шандау” төркеме, Азалия Мәгъсүмова, Айбулат Гыйләҗетдинов, Сәид һәм Әмир Галиуллиннар, Камилла һәм Кирилл Михайловлар, шулай ук Кытайдан Ли Шаньшань һәм Джихан Джихао – Н.Җиһанов исемендәге Казан дәүләт консерваториясе студентлары.

Катнашучыларны һәм оештыручыларны Бөтендөнья татар конгрессы милли советы рәисенең беренче урынбасары, Бөтендөнья татар конгрессы башкарма комитеты җитәкчесе Данис Шакиров исеменнән котладылар.

Чара профессиональ музыкантларны үстерү һәм Татарстан белән Башкортстан республикалары арасында дустанә мөнәсәбәтләр урнаштыру максатыннан үткәрелде.

Һәр лауреат мәдәният министрлыгы урынбасары Дамир Данил улы Нутфуллин исеменнән мактау грамоталары белән бүләкләнде.