2020 елның 7 июлендә каты авырудан соң Татарстан һәм Чувашиянең атказанган мәдәният хезмәткәре, Чувашия татарларының милли-мәдәни мохтарияте җитәкчесе, «Мишәр» фольклор ансамбленә нигез салучы Фәрит Гыйбатдинов арабыздан китте.

Мәрхүм татар телен үстерү, татар халкының гореф-гадәтләрен саклау буенча зур эш башкарган. Аның тырышлыгы белән «Мишәр» фольклор ансамбле Чувашиядә генә түгел, аннан читтә дә киң танылу алган.

Бүген милләттәшебезнең туган авылы Урмайда Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев булды. Биредә Милли Шура рәисе Фәрит Гыйбатдиновның туганнары һәм якыннары белән бергә зиратка барып, аның рухына дога кылды.