«Илһам» иҗтимагый оешмасы җитәкчесе, Төмән өлкәсенең иҗтимагый палатасы әгъзасы Тимур Нигъмәтуллин 28 ноябрь көнне Ялутор районы, Аслана урта мәктәбендә 9-10 сыйныф укучылары һәм Яңа Атъял урта гомуми белем бирү мәктәбендә 6-8 сыйныф укучылары өчен “Инклюзив аралашу дәресләре” үткәрде. Әлеге дәресләр мәктәп укучыларында сәламәтлекләре чикле булган яшьтәшләре белән аралашу күнекмәләрен формалаштыруга юнәлдерелгән.

Бу дәрестә балалар уен формасында иптәшләренең көндәлек тормышта нинди уңайсызлыклар кичерүләре һәм үзләрен ничек хис итүләре белән танышырга туры килде. Бу турыда үзенең фикерләре белән бүлешеп Тимур Йолдыз улы: «Мондый дәресләрне квест формасында үткәрү бик отышлы ысул, дип уйлыйм. Бер үк вакытта инклюзив үзара бәйләнеш процессы бара, бу аралашуда булган һәм яңа барлыкка килгән киртәләрне җиңәргә ярдәм итә”, – диде. Укучылар бу дәрестән канәгать калдылар.

Чыганак: “Яңарыш” газетасы