27 октябрьдә Тубыл шәһәренең «Минем территория» мультиүзәгендә Татар балалар лидер мәктәбе узачак. Бу хакта оештыручылар хәбәр итә.
Татар балалар лидер мәктәбенең төп максаты – Тубыл шәһәрендә яшәүче татарлар арасында талантлы һәм актив балаларны ачыклау, аларны яшьләр оешмасы эшчәнлегенә һәм төбәкнең иҗтимагый милли-мәдәни тормышына җәлеп итүдән гыйбарәт.
Чараның бурычлары:
– лидерлык сыйфатларын ачыклау һәм формалаштыру;
– командада эшләргә өйрәтү;
– милли үзаңны ныгыту;
– актив балалар арасында тәҗрибә һәм белемнәр белән алмашу өчен шартлар тудыру.
Татар балалар лидер мәктәбенең программасы лекцияләр, гамәли дәресләр, түгәрәк өстәлләр, тренинглар, дискуссия-уеннар, теге яки бу өлкәдә уңышка ирешкән кешеләр белән очрашулар, төрле викториналарны үз эченә ала.
Татар балалар лидер мәктәбендә катнашу өчен 14-17 яшьлек 15 бала чакырыла. Катнашу бушлай.
Чара «Идел» яшьләр үзәгенең авторлык проекты булып тора һәм әлеге үзәк ярдәмендә гамәлгә ашырыла.
