Ульяновск өлкәсенең Димитровград шәһәрендә өлкә мәктәпләрендә укучыларның «Идел буе халыклары» фестивале узды. Анда торле сыйныфларда укучы 45 татар баласы катнашты. Алар бер атна дәвамында «Юность» лагеренда һәртөрле милли чараларда катнашып, үз милләтенең тарихы, гореф-гадәтләре, мәдәнияте турында сөйләделәр.

Фестиваль кысаларында төрле остаханәләр дә эшләде. Шуларның берсе журналистка буенча. «ТНВ» каналы журналистлары балаларны бу һөнәрнең серләре белән таныштырды. Укучылар бер-берсеннән интервью алдылар.

Ә Ульяновск татар мәдәнияте үзәге хезмәткәрләре татар халкының милли киемнәре, милли ризыклары турында сөйләделәр. Фестивальгә килүче балалар Г.Тукай әкиятләре буенча әзерләнгән сәхнә әсәрләрен дә күрсәттеләр.

Ульяновск татар милли-мәдәни мохтарияте рәисе
Рамис Сафин