Әстерхан өлкәсенә эш сәфәре кысаларында Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев “Дуслык” татар милли мәдәнияте җәмгыяте офисында булды. Биредә ул оешма активы белән очрашты.
Җәмгыять офисында Россия Герое Азамат Бердыевның Мактау бүлмәсе оештырылган, биредә Васил Шәйхразыев мемориалга чәчәкләр салды.
Оешмага 1989 елда нигез салынган һәм быел ул 35 еллык юбилеен билгеләп үтә. “Дуслык” төбәктә татар милли мәдәниятен, татар халкының телен һәм тарихын саклап калуга һәм популярлаштыруга юнәлдерелгән зур нәтиҗәле эш алып бара.
Милли Шура Рәисе очрашуда катнашучыларны күркәм дата белән котлады һәм бу еллар дәвамында оешманың татар мәдәниятенең чын йөрәгенә әверелүен, кешеләрне берләштерүен, бердәмлек һәм үзара аңлашу атмосферасын тудыруын билгеләп үтте.
