Бүген, 10 ноябрь көнне, Башкортстанның атказанган мәдәният хезмәткәре, Татарстанның атказанган артисты, «Русиянең татар авыллары ассоциациясе» Бөтенрусия иҗтимагый оешмасы рәисе, җәмәгать эшлеклесе һәм композитор, милләтебезнең йөзек кашы Фәнир Галимов күркәм гомер бәйрәмен – 70 яшьлек юбилеен билгели.

Ул 1953 елда Туймазы районы Төмәнәк авылында дөньяга килеп, бүгенге көндә дә шунда гомер итә. Аны Башкортстанда һәм Татарстанда иҗат кешесе генә түгел, ә милли җанлы, милләтне үстерүгә сүз белән генә түгел, эше белән дә көч куючы шәхес дип беләләр.

Фәнир Гыйлметдин улы башлангычы белән төзелгән «Бабай утары» ачык һавадагы музей-комплексы белән Төмәнәк авылы дан тота. Шулай ук, аның тырышлыгы белән 2017 елда Туймазыда “Төмәнәк” Татар иҗтимагый тарихи-мәдәни үзәге ачыла.
Фәнир Гыйлметдин улын матур гомер бәйрәме белән ихлас күңелдән котлыйбыз! Ныклы сәламәтлек, озын гомер, эшегездә зур уңышлар телибез.

Милләткә кылган игелек-изгелегегез үзегезгә күптән-күп артып кайтсын, Фәнир абый!

Чыганак: БРда БТК вәкиллеге