Моннан кырык ел элек, 1982 нче елда КПСС үзәк комитеты илебез халкын туклану продуктлары белән тәэмин итү һәм яшьләрне авылда калдыру максатыннан “Азык-төлек программасын” кабул итә. Нәкъ менә шул елны Апас районының Урта Балтай урта мәктәбен тәмамлаучы 18 кыз һәм 9 егет ул чактагы кебек әйтсәк, “үз теләкләре белән” туган авылларында калырга булалар. Дөресрәге, аларга аттестатлар бирелә, ләкин анда мөһер (печать) сугылмаган була. Яшьләр бер ел яңа ачылган терлекчелек комплексында эшлиләр. Ә алдагы елда инде аларны башка сыйныфлар алыштыра. Шулай итеп, коммунистлар партиясе карары тормышка ашырыла башлый. Беренче булып авылда эшкә калганнарның 8 е чыннан да, тормыш юлларын авыл белән бәйләп бүген дә Урта Балтайда гомер итәләр, гаилә корып балалар үстерәләр…. Беренче башлангычның башында торган әлеге егет-кызлар кырык елдан тәүге тапкыр туган якларында очрашуга җыелды. Үзе дә шушы сыйныфта укып, бер ел терлекләр караган хәбәрчебез Рамис Сафин әлеге очрашуның кайбер мизгелләрен безгә дә тәкъдим итә.