Бүген Бөтендөнья татар конгрессы ММЧ белән эшләү идарәсе җитәкчесе Гөлназ Шәйхиева җитәкчелегендә Татарстан Республикасыннан журналистлар төркеме пресс-турга Киров өлкәсенең Малмыж районына килделәр. Сәфәр кысаларында журналистлар Иске Йөрек авылындагы 5 авыл тарихын берләштергән музей белән таныштылар. Музейда авыл тарихын яктырткан стендлар, фотосурәтләр, көнкүрешкә бәйле тарихи экспонатлар тәкъдим ителгән.

Әлеге музей бик бай. Музейга килгән кунаклар да сокланып китәләр. Авыл музее булдыру ниятен шушы авылдагы “Зерновой” колхозы рәисе Рашид Гафиулла улы Хәлиуллин белдерә. 2020 елның февраль аенда ул, күмәк хуҗалык правлениесы җыелгач, колхозның иске контора бинасында музей оештыру тәкъдиме белән чыга. Бу фикерне барысы да хуплап ала.