Китап сөючеләр язучы-шагыйрьләребезне шат күңел белән каршы алдылар, чөнки шигъриятне сөяләр, әдәби китапларны яратып укыйлар. Яшь иҗатчыларыбыз да күп хәзер. Менә «Казан утлары»ның өченче, март ае санында унбиш райондашыбызга шулкадәрле күп урын бирелгән, куанып укырлык.

Үзебезнең төбәкнең мәшһүр шагыйрьләренә алмашка Эльвира һадиева, Резеда Гобәева, Лилия Гарифуллина, Зөһрә Рамазанова, Алмаз Әхмәтгалиев, Ринат Галиәскаров, Гөлинә Шәйхи, Гөлназ Әхмәдиева, Рәйсә Абдуллина һәм башка бик күп иҗат җанлы райондашларыбыз килде.

— Безнең районда шигърияткә район башкарма комитеты җитәкчесе Айдар Хәйретдинов та зур игътибар бирә, — ди районның әдәби берләшмә җитәкчесе Резеда Зарипова. — «Ак җилкәндәй ак хисләр» дигән шигырьләр җыентыгы басмада килеш, — менә ул да аның инициативасы.

«Казан утлары» журналында ел башыннан «И туган тел, и матур тел» дигән девиз астында «Әдәби берләшмәләрдә» дигән сәхифә чыгара башлаган. Иң әүвәл Биектаудан тотынганнар, ничек шуннан, шигъриятнең чишмә башы — Габдулла Тукай төбәге —Арча районы түгелме?!

— Чөнки мин Биектаудан, — ди Рәфис Корбан елмаеп. — Биектаудагы әдәби берләшмәгә кураторлык итәм. Безнең районнан да чыккан мәшһүр шәхесләр күп, аларның исемнәрен мәңгеләштерәсем килеп, образларын әдәби әсәрләргә кертәм. Гыйльми эшләргә караганда халкыбыз әдәби әсәрләрне күбрәк укый, күңелдә дә кала. Ә бу «Әдәби берләшмәләрдә» дигән эшчәнлегебезне Татарстан Президенты каршындагы Татар телен саклау һәм үстерү мәсьәләләре комиссиясе рәисе Марат Әхмәтовның ярдәме белән алып барабыз, без инициативабызны аңа белдердек тә, ул идеябезне күтәреп алды. Үзе дә Балтач ягыннан, безнең балтачлылар да күренсен журналда, диде. Бактың исә Балтач районы шигърияттә бик алга киткән икән, күпме шагыйрә үстергән, араларында ир-егетләр дә бар.

Шигъриятнең шушылай җырлап үсеш алуында, һичшиксез, шагыйребез, үзе үк тә 24 китап авторы Гарифҗан Мөхәм-мәтшинның роле зур. Шагыйрьләребез аның эзеннән бара, бик күбесенә бәяләмәләр язып, шигърият дөньясына җитәкләп диярлек алып кергән шагыйрь-әйдәүче ул. Үзенең робагыйларын укып та күңелләрне хушландырды.

Фәнил Гыйләҗев Балтач районын иҗат буенча алдынгылар рәтенә кертә, Зөһрә Рамазанова белән Алмаз Әхмәтгаливны өл-гереп житкән шагыйрьләр дип мактады мөхтәрәм кунакларыбыз.

Вакыйф Нуриев Балтач җирен могҗизалы як, ди, Биредә Тукай көннәрендә Бибимәмдүдә каберендә зыярат кылгачтын, Рәдиф Гаташ, Зиннур Мансуров мәртәбәле премияләр алды, дип елмайтты. Рәфис Корбанны быел Габдулла Тукай премиясенә тәкъдим иткәннәр, арада райондашыбыз, «Казанга Тукай кайткан» спектакле иҗат төркеменнән Резеда Зәйниева да төркемдәшләре белән бар.

Очрашуда шагыйрьләребезгә кушылып Зөһрә Рамазанова, Сәлимә Габделхакова, Җәмилә Сибгатуллина, Мәгъмүрә Хөрмәтуллина да үзе язган шигырьләрен укыдылар, әле яңа бөреләнеп килгән яшь шагыйрәләр Нөнәгәр авылыннан Финзия Әсхәдуллина, Гөлия Хәйруллинаның шигырьләре дә матур яңгырый.

Шигърият дөньясыннан тиз генә китеп булмады, кызыксынучылар мәшһүр язучыларыбыздан автографлар алды, бергәләп фотоларга төште, «Казан утлары» журналының быелгы саннарына ия булды. Журнал бик кызыклы, эчтәлекле, прозасы, шигърияте дә бар, тәнкыйть язмалары да урын алган. Киләсе санда тагын безнең райондашларның иҗаты урнаштырылачак. Очрашулар шулай булып торсын, очрашкан саен бай тарихлы «Казан утларына»да кызыксыну арта!