“Сөйкемле Шүрәле” бөтенрусия иҗат эшләре бәйгесе татар халкының мәшһүр шагыйре Габдулла Тукайның мирасын популярлаштыру, мәктәп укучыларының иҗади сәләтләрен барлау максатыннан уздырыла.

Бәйгене Татарстан Республикасының Мәдәният министрлыгы, Республиканың традицион мәдәниятне үстерү үзәге, Г.Тукайның иҗади мирасын саклау һәм үстерү фонды, Татарстан Республикасының Милли музее, Татарстан Республикасының сынлы сәнгать музее һәм “Татмедиа” матбугат һәм массакүләм мәгълүмат чаралары агентлыгы оештыра.

Бәйгедә Русия төбәкләреннән 1-10 сыйныф укучылар катнаша ала.

Иҗат эшләре өчен Габдулла Тукайның шигырьләре, поэмалары, әкиятләре нигез булып тора ала. Эшләрне ялгыз гына да, төркем исеменнән дә җибәрергә мөмкин.