18 май көнне Кырым татарлар халкы депортацияләнгәнгә 70 ел тулу уңаеннан Кырымның күп шәһәр һәм авылларында митинглар булып узды. Бу чараларда Татарстан Республикасы Президенты аппараты җитәкчесе Ә.Ә. Сәфәров җитәкчелегендәге делегация катнашты. Делегация иртән, Симферопольнең индустрия- педогогика университетында булып, биредәге депортациягә багышлап эшләнелгән мемориальгә чәчәкләр куйды.
Аннан Бакчасарай шәһәрендә Кырым татарлары Милли мәҗлесе активистлары белән очрашу үтте. Әңгәмә барышында яңа шартларда Кырым татар халкының мәнфәгатьләрен яклау буенча конкрет адымнар кирәклеге турында ассызыкланды.
Делегация әгъзалары Бакчасарайдагы яңа нигез салынган “Татарстан-Кырым дуслыгы” бакчасына агач та утыртты.
Көннең икенче яртысында, алар Симферопольдәге Акмәчет бистәсендә үткән зур митингта да катнашты. Делегация составында Бөтендөнья татар конгрессы Башкарма комитеты рәисе Ринат Закиров та бар иде.
