Бүгенге көнгә Башкортстанда «Ак калфак» татар-хатын кызлар ассоцияциясенең 50 дән артык бүлекчәсе уңышлы эшләп килә. Шушы көннәрдә ул тагы бергә артты, Кырмыскалы районы Кабак авылында үз эшен башлады.

Тантаналы чараны Башкортстан хатын-кызлар ассоциясиясе төбәк иҗтимагый оешмасы идарә рәисе Люция Ябир кызы Вафина ачты. Аның әйтүенчә, бу чараның максаты – балаларыбызга дөрес тәрбия бирү, гореф-гадәтләребезне саклау, телебезне югалтмаска, киресенчә, үстерү өчен төрле чаралар үткәрү. Рәссам-модельер Гөлнарита Камалова балаларга һәм теләүчеләргә татар калфагы тегү, чигү серләре белән уртаклашты. Яңа гына туган «Илсөяр» төркеме, җитәкчесе Ахметшина Халисә Носратулла кызы, «Әбиемнең күңел сандыгы» исемле әдәби-музыкаль тамаша күрсәтте.

Мәктәп балалары исә туган телгә багышланган шигырьләр, җырлар, табышмаклар белән җыелган халыкны куандырды. Композитор Мидхәт Әбдельманов оештырган «Милли аваз» төркеме әби-бабаларыбыз җырлаган борынгы җырларны тамашачыларга ишеттерде.