КФУның Филология һәм мәдәниятара багланышлар институтында ТР Дәүләт Советы Рәисе урынбасары Марат Әхмәтов белән очрашуда студентлар татар әдипләре һәм галимнәренә багышланган проект эшләрен тәкъдим итте. «Шәхес» дип аталган видеопроектның максаты – танылган татар галимнәренең мирасын саклау. Тапшыру 30 минут дәвам итә һәм институт фондында саклана.

«Быел тел һәм әдәбият өлкәсендәге галимнәр белән эшләдек. Алга таба да төрле фәнни өлкәдә хезмәт куйган татар галимнәре турында тапшырулар әзерләргә уйлыйбыз. Тапшыруны киңәйтеп, әдәби-документаль фильм форматта да эшләү мөмкинлеге булыр дип планлаштырабыз», – диде проектны әзерләүче студентлар.

Марат Әхмәтов мондый тапшырулар тарих өчен кирәклеген һәм аларны телевидениеда күрсәтергә кирәклеген әйтте.

«Бу проектны «Яңа Гасыр» телерадиокомпаниясенә тәкъдим итеп карагыз, аларның иләгеннән ничек үтәр икән. Бу студентларның үз иҗаты буларак та бик кадерле», – диде ул.

Чыганак: tatar-inform.tatar