Узган ялларда АКШның Флорида штатында 2023 елның беренче Сабан туе узды. Быелгы бәйрәмгә милләттәшләребез аеруча күпләп җыелды. Бирегә Татарстан һәм Башкортстаннан тыш, Пенза, Оренбур, Чиләбедән килеп урнашкан татарлар килгән.
Сабантуй балалар тарафыннан әзерләнгән “Дуслар йорты” спектаклен тәкъдим итү белән башланып китте. Аннары бәйрәм капчык киеп йөгерү, аркан тарту, кашыкка йомырка куеп йөгерү һәм башка ярышлар белән дәвам итте. Соңыннан исә милләттәшләребез татарча җырлап, биеп күңел ачты.
Әйтергә кирәк, күпчелек кеше бәйрәмгә милли ризыклар әзерләп килгән. Халык өчпочмак, гөбәдия, кыстыбый, кош теле, бәлешләр белән сыйланып, аралашып яңа элемтәләр булдырды.
Бөтендөнья татар конгрессы Башкарма комитетының
Чит илләрдәге татар иҗтимагый оешмалары белән эшләү бүлеге
