Язучылар берлегендә яшь шагыйрьләр кичәсе алдыннан Казахстанның Казандагы Генераль консулы Җанболат Мурзалин тәрҗемәче һәм язучы Лирон Хәмидуллинга, шулай ук галим, филология фәннәре докторы Хатыйп Миңнегуловка казах-татар мәдәни багланышларны үстерүгә керткән өлешләре өчен Рәхмәт хатлары тапшырды.
Хатыйп Миңнегулов Казахстанның Мәдәният министры Рәхмәт хаты, Лирон Хәмидуллин Казахстан Президенты Касым-Жомарт Токаевның Рәхмәт хаты белән бүләкләнделәр.
Очрашуда Генераль Консул Жанболат Мурзалин Нур-Солтан шәһәренең бер урамына татар халкының күренекле вәкиле – шагыйрь Габдулла Тукай исемен бирү карары турында да хәбәр итте. Татарстан Язучылар берлеге Рәисе Ркаил Зәйдулла әлеге уңайдан сөенче итеп консулга Тукай энциклопедиясен тапшырды.
